په‌رله‌مانی كوردستان، ئاماری كار و چالاكییه‌كانی دوو وه‌رزی كۆبونه‌وه‌كانی ساڵی ڕابردووى بڵاوكرده‌وه و به‌پێی ئاماره‌كه‌ش، له‌ماوه‌یه‌دا 12 بابه‌تی گشتی بۆ گفتوگۆ خراونه‌ته به‌رنامه‌ی كۆبونه‌وه‌كان و 20 پرۆژه‌یاساش په‌سه‌ندكراون.
له ڕاگه‌یه‌ندراوێكدا، په‌رله‌مانی كوردستان،ئاماژه‌ى به‌وه‌كردووه، پاڵپشت به حوكمی بڕگه‌ی 8ی مادده‌ی 18، له په‌یڕه‌وی ناوخۆ، ده‌سته‌ی سه‌رۆكایه‌تیی په‌رله‌مانی كوردستان به فه‌رمی ئاماری كار و چالاكییه‌كانی دوو وه‌رزی گرێدانی ساڵی 2021ی بڵاوده‌كاته‌وه به‌پێی ئاماره‌كانیش، له‌و ماوه‌یه‌دا 32 كۆبوونه‌وه‌ی ئه‌نجامدراوه.
ئه‌وه‌شخراوه‌ته‌ڕوو، له‌و ماوه‌یه‌دا 12 بابه‌تی گشتی بۆ گفتوگۆ خراونه‌ته به‌رنامه‌ی كۆبونه‌وه‌كان و نۆ بیرۆكه‌ش له‌لایه‌ن ئه‌ندامانی په‌رله‌مانه‌وه خراونه‌ته‌ڕوو.
له به‌شێكى دیكه‌ى ئاماره‌كه‌ى په‌رله‌ماندا هاتووه، له وه‌رزی یه‌كه‌م و دووه‌می دانیشتنه‌كانی په‌رله‌ماندا، چوار ڕاسپارده ئاراسته‌ی حكومه‌تی هه‌رێم كراون، هه‌روه‌ها هه‌شت فه‌رمانیش له‌لایه‌ن په‌رله‌مانه‌وه ده‌كراوه، كۆی گشتی بریاره‌كانیش 12 بڕیارن.
هه‌روه‌ها په‌رله‌مانى كوردستان له ساڵى ڕابردوودا خوێندنه‌وه‌ی بۆ 20 پرۆژه‌یاسا كردووه و سه‌رجه‌میانی په‌سه‌ندكردووه.
ئه‌وه‌شهاتووه، “39 جار وه‌زیر و سه‌رۆكی دیوانی ئه‌نجومه‌نی وه‌زیران له كۆبونه‌وه‌كانی په‌رله‌مان ئاماده‌بوون، هه‌روه‌ها 117 جاریش سه‌رۆكی ده‌سته و بریكاری وه‌زیر و به‌ڕێوه‌به‌رایه‌تیی گشتی و به‌ڕێوه‌به‌ر و ڕاوێژكاران ئاماده‌ی كۆبونه‌وه‌كان بوون.
