کۆشکی سپی ڕایگەیاند، جۆ بایدن سەرۆکی ئەمریکا ڤلادیمێر پوتینی ئاگادارکردووەتەوە لە ڕووبەڕووبوونەوەی ڕوسیا بە “سزای توندی ئابوری و دیکەش” لەئەگەری هێرشی سەربازیی ئەو وڵاتە بۆسەر ئۆکرانیا.
لە میانی بەڕێوەچوونی لوتکەی ئەمریکا – ڕوسیا کە بە ئۆنلاین بووە، جۆ بایدن ترسی وڵاتەکەی و هاوپەیمانەکانی پیشانداوە لە کۆکردنەوەی هێز لەلایەن ڕوسیاوە لەسەر سنووری ئۆکرانیا، هۆشداریشی داوەتە پوتین کە ئەگەر ڕوسیا هێرشی سەربازی ئەنجامبدات، ڕووبەڕووی “سزای ئابوری و سزای دیکەش” دەبێتەوە.
لە دیدارەکەدا واشنتن سووربووە لەسەر ڕەتکردنەوەی هەرجۆرە ئاڵۆزییەک لەگەڵ ئۆکرانیا و جەختی لە ڕێزگرتن لە سەربەخۆیی ئۆکرانیا کردووەتەوە، هەروەها گەڕانەوەی مۆسکۆی بۆ ڕێڕەوی ستراتیژیی بەپێویست ناوبردووە.
کۆبوونەوەی لوتکەی جۆ بایدن سەرۆکی ئەمریکا و ڤلادیمێر پوتین سەرۆکی ڕوسیا لەڕێگەی ئۆنلاین و بۆ ماوەی دوو کاتژمێر بەردەوامبوو، کۆبوونەوەکە جەختی لە کاری شاندەکانی هەردوولا کردەوە بۆ بەردەوامیی گفتوگۆکانی نێوانیان.
لە گرتەیەکی ڤیدیۆییدا کە کۆشکی سەرۆكایەتیی ڕوسیا – کرملین بڵاویکردەوە، پوتین لەسەر مێزێک لە ژووری ئۆپەراسیۆنەکانی کرملین دەردەكەوێت و لەیەکەم وتەیدا بە زەردەخەنەوە دەڵێت، “سڵاو بەڕێز سەرۆک”.
لەبەرامبەردا کۆشکی سپی هیچ گرتەیەکی کۆبوونەوەکەی بڵاونەکردەوە، تەنها ئەوەی ڕاگەیاند، کە جۆ بایدن لە ژووری ئۆپەراسیۆنەکانی کۆشکی سپی دیدارەکەی ئەنجامداوە.
