لە هێرشێکی داعشدا کە شەوی رابردوو بۆ سەر خاڵێکی پاسەوانی هێزەکانی پێشمەرگەی لیوای 5ی پیادە لە تەپکی (کەڵان) لەسنووری کوڵەجۆ ئەنجامیدا پێنج پێشمەرگە شەهیدبوون و چواریش بریندارن.
پەیامنێری تۆڕی میدیایی ئێستا لە شوێنی هێرشەکە ڕایگەیاند، لەکاتی ڕووبەڕووبوونەوەی هێزەکانی پێشمەرگە لەگەڵ چەکدارانی داعش کە لە کاتژمێر 10:13 خولەک ئەنجامیانداوە، ئۆتۆمبێلێکی سەربازیی هێزەکانی پیشمەرگە بۆ پاڵپشتی ڕۆیشتووە لەوکاتەدا بۆمبێکی چێنراو بەئۆتۆمبێلەکەدا تەقیوەتەوە.
بەپێی زانیارییەکانی تۆڕی میدیایی ئێستا، لەئەنجامی تەقینەوەی ئەو بۆمبە پێنج پێشمەرگە شەهیدبوون و چواری دیکەش بریندارن.
یەکێک لە پێشمەرگەکان دوای ئەوەی لەناو ئۆتۆمبێلەکەدا بووە و برینداربووە چەکدارانی داعش دەچنەسەری و بە گوللـە شەهیدی دەکەن.
سەرجەم شەهیدەکان خەڵکی قەزای شارەزوورن، دووانیان پلەیان ڕائیدە کە یەکێکیان فەرماندەیان بووە.
پێشتر وەزارەتی پێشمەرگە ڕایگەیاند، کە تەنها چوار پێشمەرگە شەهیدبوون هێرشەکەی داعش تێکشکێنراوە.
