پەرلەمانتارێكی گۆڕان سكاڵایەكی بردەوە، كە لەلایەن بەڕێوەبەری دەروازەی باشماخەوە بەتۆمەتی ناوزڕاندن لەسەری تۆماركرابوو.
لەماوەی ڕابردوودا و پێش چاكسازییەكانی 8ی تەمووز، لەسەر بوونی كاری نایاسایی و قاچاخ، وەزیری دارایی بڕیاریدابوو مینحەی بەڕێوەبەری دەروازەی باشماخ ڕاگرێت، دابان محەمەد پەرلەمانتاری گۆڕان بابەتەكەی بڵاوكردبووەوە و قسەی لەسەركردبوو، بۆیە بەڕێوەبەرەكە سكاڵای لەسەر پەرلەمانتارەكە تۆماركردبوو بەتۆمەتی ناوزڕاندن.
دابان محەمەد، ئاشكراكردووە، “بەڕێوەبەری دەروازەی باشماخ لەسەر قسە و لێدوانەکانی ئێمە بە تۆمەتی ناوزڕاندن، لە دادگای لێکۆڵینەوەی پێنجوێن سکاڵای لە دژ تۆمارکردین”.
پەرلەمانتارەكە دەڵێت، بۆ سەلماندنی قسە و لێدوانەکانی، لەبەردەم دادوەری دادگای لێکۆڵینەوەی پێنچوێن ئامادەبووە و بەڵگەکانی خستووەتەڕوو، دواتر دادوەر سكاڵاكەی ڕەتكردووەتەوە و “دۆسیەکەش لەبەرژەوەندیی ئێمە داخرا”.
پەرلەمانتارەكەی گۆڕان ئاشكراشیكرد، ساڵی ڕابردوو کۆی بەدواداچوون و دۆسیەکانیان ڕادەستی داواکاری گشتی و لایەنەکانی پەیوەندیدار بەو پرسە کردووە.
