بەر لەھاتنی وەرزی بارانبارین لە سلێمانی ئامادەکاری دەکرێت بۆ ئەوەی لەکاتی دروستبوونی لافاو و ڕووداوی سروشتیدا تیمەكان بەھانای ھاوڵاتییانەوە بچن.
لە ڕاگەیەندراوێكدا قائیمقامیەتی سلێمانی ئاماژەی بەوەكردووە، قائیمقامیەتی سلێمانی بە ھەماھەنگیی فەرمانگە پەیوەندیدارەکانی شارەکە، لەگەڵ نزیکبوونەوەی وەرزی بارانباریندا ئامادەکاریی پێشوەختەی دەستپێکردووە بۆ ئەوەی لەکاتی لافاو و ڕووداوی سروشتیدا بەھانای ھاوڵاتییانەوە بچن.
لە بارەی پلانەكەوە ئاوات محەمەد قائیمقامی سلێمانی ڕایگەیاندووە، “وەک ھەنگاوی یەکەم تیمەکانی شارەوانی دەستیانکردووە بە پاککردنەوەی مەنهۆڵ و ئاوەڕۆکان بۆ ئەوەی لەکاتی بارانبارینی بەخوڕ ڕێگری بکرێت لە دروستبوونی لافاو و ڕووداوی نەخوازراودا”.
ئاماژەی بۆ ئەوەشکرد، ھەڵسەنگاندن و پێداچوونەوە بۆ ئەو شوێن و گەڕەکانەی سلێمانی دەکرێت کە لە ساڵانی ڕابردوودا بەھۆی دروستبوونی لافاو زیانیان بەرکەوتووە، ئەمەش لەڕێگەی گرتنەبەری چەند ھەنگاوێکی پێویست و پێشوەختەوە.
