وەزارەتی ناوخۆی عێراق ئەمڕۆ چوارشەممە ڕایگەیاند، هێزەكانی باندێكیان لە ناوچەی مەشتەل لە بەغداد دەستگیركردووە كە لە 18 كەس پێكهاتووە و كاریان بازرگانیكردن بە كچانەوە بووە.
لە ڕاگەیەندراوێكدا وەزارەتەكە ڕوونكردنەوەی داوە و دەڵێت، ئەو 18 كەسە ژن و پیاون و لەلایەن دوو ژنەوە بەڕێوەبراون، لەكاتی ئەنجامدانی تاوانێكی فرۆشتنی كچدا دەستگیركراون و دانیان بەوەدا ناوە كە كاریان لەشفرۆشی و بازرگانیكردنە بە كچانەوە.
بەپێی ڕاگەیەندراوی وەزارەتی ناوخۆ، هێزەكانی بەڕێوەبەرایەتیی نەهێشتنی تاوانی بەغداد چەندین كەسی تریان دەستگیركردووە بەتۆمەتی دزینی پارە و ساختەكاری و دزیكردن لە ماڵان و فرۆشگەكان.
حاڵەتەكانی بازرگانیكردن بە كچان و ئەندامانی جەستەی مرۆڤەوە لە بەغداد زیادیانكردووە، لە ماوەی چەند مانگێكدا پێنج باند كە ئەو كارانەیان كردووە دەستگیركراون.
